【晴報專訊】陳啟泰、寶珮如、林韋辰及魏秋樺等一班「亞視之友」，前晚亮相無綫音樂節目《流行經典50年》。陳啟泰笑言今次跟亞視舊同事聚首，趁機回憶昔日一起工作的日子，今年入行30周年的他，對於為無綫拍劇抱開放態度。

陳啟泰與寶珮如在無綫節目上聚舊，非常開心。

　　曾效力無綫的陳啟泰，前晚笑言已離巢22年︰「我都係第一次入嚟將軍澳電視城，上次離開無綫已經係1998年，揸車出咗將軍澳隧道都要set導航先識得入嚟。」適逢入行30年，陳啟泰說︰「今次好開心，除咗見到一班亞視舊同事，又重遇22年前認識嘅無綫幕後工作人員，令我回想起喺無綫同亞視工作嘅日子。」

（左起）林韋辰、潘志文、薛家燕、陳啟泰及魏秋樺，一見面即雞啄唔斷。

　　問到陳啟泰會否有興趣返TVB拍劇？他笑說︰「我一直都好open，其實自從亞視倒閉後，都有舊同事代表TVB搵過我返去拍劇。」陳啟泰表示在節目中獻唱亞視經典劇集《我和殭屍有個約會2》的主題曲《假如真的再有約會》︰「呢部劇好代表到我，有少少感嘆，因為呢隻歌會喺TVB出街。」

譚嘉儀自稱有料之人

譚嘉儀前晚低胸兼露腰，但稱不及薛家燕搶鏡。

　　同場的節目主持譚嘉儀，笑言面對一眾亞視前輩，她錄影前特地上網做功課，又自爆10歲時曾在亞視表演。她說︰「我當時有份演出籌款節目《今日愛心睇真D》，我扮鄭秀文唱歌跳舞。」另外，譚嘉儀近來在節目中經常性感示人，她表示一身服裝都是由公司安排︰「公司知道我嘅尺寸，當然唔需要加墊，係自然嘅，不過每次返公司，我都自備打底衫褲。」提到她本身屬有料之人，她笑說︰「我喺音樂上係有料之人，藝人應該多方面發展，但依家音樂行先，暫時無諗過出寫真集。」